O deus, miseri
Miserere servi.
Ex quo enim me iussisti hunc in mundum nasci,
Prae cunctis ego amavi vanitate pasci.
Heu, quod evenit mihi.

O deus, miseri
Miserere servi.
Tu me, domine, fecisti, ut servirem tibi,
Ego miser te dimisti et longe abivi.
Heu, quod evenit mihi.

O deus, miseri
Miserere servi.
Tu me quoque redemisti de iugo servili
Et ego te non agnovi nec ad te redivi.
Heu, quod evenit mihi.

O deus, miseri
Miserere servi.
Mandata, quae precepisti, pro dolor! reliqui;
Fateor voce lugubri: nimium deliqui.
Heu, quod evenit mihi.

O deus, miseri
Miserere servi.
Almam legem, quam dedisti, denique neglexi
Et illa, quae vetuisti, avide dilexi.
Heu, quod evenit mihi.

O deus, miseri miserere servi.
Cuncta bona praeterivi animo libenti
Atque multa mala egi pectore ferventi.
Heu, quid evenit mihi.

O deus, miseri miserere servi.
Voluntates non dimisi sed his me addixi
Et totius me peccati vinculis devinxi.
Heu, quid evenit mihi.

O deus, miseri miserere servi.
Iram tuam provocavi crimine frequenti
Ideoque te offendi offensa ingenti.
Heu, quid evenit mihi.

O deus, miseri miserere servi.
Sed quid plura dicam tibi, o pia lux saecli.
Mala, quaeque permisisti, cuncta miser feci.
Heu, quid evenit mihi.

O deus, miseri miserere servi.
Ergo iam succurre flenti, domine, clienti
Scelera tibi fatenti veniam petenti.
Heu, quid evenit mihi.

O deus, miseri miserere servi.
Affer opem indigenti iam manu clementi
Vulneraque detegenti medere languenti.
Heu, quid evenit mihi.

O deus, miseri miserere servi.
Subveni te invocanti et in te speranti
Dextram da, quem redemisti, iam perclitanti.
Heu, quid evenit mihi.

O deus, miseri miserere servi.
Igitur vos omnes sancti, coheredes Christi,
Exorate prece dulci pro me infelici.
Heu, quid evenit mihi.

O deus, miseri miserere servi.
Alma tu Maria, tui virgo mater dei,
Interventu nunc salubri memor esto mei.
Heu, quid evenit mihi.

O deus, miseri miserere servi.
Sancte Michael, insigni supplicato regi,
Deprecentur atque cuncti angelorum chori.
Heu, quid evenit mihi.

O deus, miseri miserere servi.
Patriarchae qin electi et prophetae sancti
Suffragamini petenti precibus clienti.
Heu, quid evenit mihi.

O deus, miseri miserere servi.
Claviger quoque praecelsi, sancte Petre, regni
Socios adiungens tibi preces funde patri.
Heu, quid evenit mihi.

O deus, miseri miserere servi.
Martyrumque gloriosi beatorum globi
Flagitate pro miselli peccatis alumni.
Heu, quid evenit mihi.

O deus, miseri miserere servi.
Insignes o summi dei confessores almi
Opem ferte precor mihi oratu instanti.
Heu, quid evenit mihi.

O deus, miseri miserere servi.
Virgines o clarae vestri per amorem sponsi
Memoramini nunc mei delictis oppressi.
Heu, quid evenit mihi.

main page | contents