Dominator domine deus meus, misericordia mea, deus pater, deus filius, deus spiritus sanctus, deus trinitas et unitas, qui me sine merito meo dignatus es honorare hoc horario, tu me, piissime misericordissime clementissime domine, dignare quaeso gratis custodire die noctuque, confirmans in fide, solidans in spe, corroborans in caritate, in vera fundans humilitate et in cordis et corporis munda conservans castitate ne (quod absit) amittam hoc horarium criminalis flagitii vel favinoris iniquitate. Sed tu me, deus, libera semper ab omni malo et conserva in omni bono tua gratuita bonitate, pietate, cui est omnis honor et gloria, potestas et imperium, cui est omnis laus et iubilatio, omne decus et regnum, cui est omnis virtus et sapientia, maiestas et fortitudo, quique vincis, regnas et imperas per immortalia, infinita omniaque saecula saeculorum. Amen, amen, amen.

1.

Cursum mundi sol vergentis pariterque hominis
Designans et metas orbis ac sphere volubilis
Circumlustrans mutat acta conficit et tempora
Annorum necnon inmensa peragit curricula,
Momenta volvens alterna per aetatum milia.
Vectus aureo figmento, et curru quadriiugio,
Lucidus in poli centro corporali radio,
Via regia libratim per menses duodecim
Horas fingit, dies agit, oritur et occidit,
Bisque secat zodiacum, binis aequinoctium
Tangens punctis quadruplatum reddit emisferium.
Hominis sunt ista, deus, ordinata dotibus,
Qui fungit vita diebus pariter et noctibus;
Iussus, quatuor ditatus te duce virtutibus
Bina pulsat caelum luce: intellectu, opere.
Ergo, creator aeterne, pater potentissime,
Qui per filium tam magnam construxisti machinam
Atque hominem qui tuam condis ad imaginem
Quique nobis pignus sanctum dedisti paraclitum,
Miseris in nostra morte sis volens succurrere,
Quam occasu solis huius anxie recolimus.
Sed in solis magni morte plurimum confidimus.
Da nobis te invenire placatum, piissime,
Cum tibi reddemus flatum singulari vespere,
Qui tempus ad vespertinum post actum diluvium
Oleae misisti ramum, homini presagium:
Nam quando misisti tuum filium carissimum,
Tale tunc nobis et tantum contulisti oleum,
Quod omnes preoccuparet balsamorum guttulas
Et aromatum fraglaret super omnes virgulas.
Ad cuius iam pedes iacet devicta mortalitas,
Cuiusque dono sanatur nostra nunc infirmitas,
Et a quo prostrata morte regnat inmortalitas.
Gloria sit deo patri, proli, quin spiritui,
Deo trino necnon uni, paci, vite, lumini,
Nomini nimirum dulci divinoque numini.

2. COMPLETORIUS

Fluxit ille labor magnus, quem diurnum dicimus,
Et redit quietis tempus, quam nocturnam pangimus.
Esto nunc, dies aeterne, custos nobis intimus,
Qui nescis oriri, certe, nescis et occumbere.
Tu vita, salus et quies, tu sine labe dies,
Tu lux perennis piorum, fons, origo mentium,
Qui noctem quietis almam tribus mortalibus,
Noctem, inquam, tenebrarum signatricem providis.
Eo ductu monuisti spatiando noviter,
Illam quod divisionem disceremus gnaviter
Principalem, quam tulisti luce atque tenebris,
Lucem probans esse bonam cunctisque perutilem
Providenter tenebrarum dirempta caligine,
Ubi lancem posuisti geminam iuditii,
Cum lex coepit exarari Moysi temporibus,
Existens tuis deductor ad promissam patriam
De nubis sub columna, nocte sub flammivoma.
Ergo, Christe, tenebrosa tolle nobis opera
Sisque nobis nube mutis, non igne terribilis,
Ut in te nunc aeternumque possimus quiescere.
Gloria, laus, honor patri, proli ac spiritui
Ex ambobus procedenti ante orsa seculi,
Trinitati lux perenni, unitati perpeti.

3. MEDIAE NOCTIS AD NOCTURNOS VIDELICET HYMNOS.

Galli cantu mediante noctis iam caliginem
Et profundae noctis atram levante formidinem
Te, deus alme, rogamus supplicesque poscimus,
Ut a nobis tollas pie chaos confusibile
Erebique chasma pellas, mortis antra conteras.
Ad hoc nam venisti clemens a paternis sedibus,
Vigil, potens, lux perennis atque custos maximus,
Dum tenerent simul cuncta medium silentium
Redderent necnon mortalem meritis effigiem,
Quo nos excitares, Christe, de somno malitiae
Atque gratis liberares nocturno de carcere
Redderesque nobis lucem, vitae semper comitem.
Namque nox signat adversa mortis et pericula
Tartarique phlegetonta pingit, antra tristia.
Contra qua venisti tandem, qui formasti hominem,
Lux aeterna, lumen potens, dies indeficiens,
Debellator atre noctis, reparator luminis
Destructorque tenebrarum, inlustrator mentium,
Quo nascente suscitamur, quo vocante surgimus,
Faciente quo beati, quo linquente miseri,
Quo a morte liberati, quo sumus perlucidi,
Quo mortis victores facti, noctis atque seculi.
Ergo nobis, rex aeterne, lucem illam tribue,
Quae nulla fuscatur nocte, solo gaudens lumine.
Gloria sit deo patri, < proli, quin spiritui,
Deo trino necnon uni, paci, vite, lumini,
Nomini nimirum dulci divinoque numini >.

4. RITHMUS MATUTINUS

Adest tempus matutinum, dulce gallicinium,
Quo morte perempta redit salvator ab inferis,
Ille blandus et tremendus, mitis et terribilis;
Qui crucis in ara pie nostrum flevit vespere
Et patri conciliavit toto fissus corpore,
Se pro nobis offerendo hostiam placabilem,
Holocaustum singulare, victimam mirabilem,
Mire multum libra pensum, dulce sacrificium.
Hinc manarunt sacramenta, quis constat ecclesia:
Sanguis, aqua, vita nostra, mistica redemptio,
Pax inormis et dulcedo, lucida purgatio.
Sicque restat sepultura, qua quiescunt mortui,
Quam providit et quadrato protulit senario
Occurrens nobis per simlum et proturbans geminum.
His ita surrexit Christus, blandus et fulgoreus,
Quod docebat ad sepulchrum iuste sedens angelus,
Qualis est electis Christus, qualis peccatoribus.
Ergo te precamur, deus fortis et omnipotens,
Lux aeterna, mane nostrum lumenque perpetuum,
Vota nostramatutina digneris respicere,
Nostros dies tua pace placeat disponere;
Salves nos vigil, aeternus a nocte operibus,
Dimittas peccata nostra, parcas facinoribus,
Facias nos crucifixos viciosis actibus
Atque tibi consepultos quadratis muneribus,
Ut, cum dies repentina tremendi iuditii
Coeperit clarere cunctis spetie terribilis
Et tubae clangor audiri, qua resurgent mortui,
Nos cognoscere digneris tuos esse proprios,
Immutatos, incorruptos pariterque lucidos,
Ac tales digneris parti deputare dextere.
Hisque votis simul iunge, deus clementissime,
Hunc diem sine peccato tribuas transigere,
Opem miseris instanter da misericorditer,
Quo tibi possimus, adherere iugiter,
Et tibi placere semper concede salubriter.
Gloria sit deo nostro, patri potentissimo,
Proli magne atque sancto flamini paraclito;
Quorum est una maiestas per aeterna secula.

5. HORE PRIME

Audi laudes hore primae, deus clementissime,
Quas tibi fundit devote necnon fidelissime
Grex pusillus ac misellus, humilis et modicus.
Namque tu es magnus sator vitis et agricola,
Non confuse nec divise tu pater familias
Operarios conducens electam in vineam,
Quo existi primo mane Abel sacrificio;
Tertia progressus inde Noe archam velitans;
Sexta pronotans et nona Abraham et Moysen,
Donec tandem tu venisti consecrans undecimam.
Hinc primum vivendi modum docens naturaliter,
Alterum per datam legem statuis legaliter
Sicque gradibus ascensis iubes spiritaliter
Vivere, sic operari mistica in vinea.
Unde fiunt iure primi, qui erant novissimi:
Spiritalis namque vita animalem iudicat
Et procedens aequa lance iam carnalem reprobat.
Ergo, deus pie clemens rexque prestantissime,
Nostram vineam moralem digneris excolere
Atque vitam puerilem misertus attollere
Ac primeve iuventutis flosculos erigere,
Totum robur iuvenile miseranter regere
Ac corpus et cor senile pie iam invisere
Et facta divisione corporis et animae
In tuas sedes beatas dignanter recipere.
Atque ista modo primis ostendas auspitiis.
Hunc diem sine peccato dona nos transigere
Et, donec te videamus, hos dies disponere
..................................................................

6. HORAE TERTIAE

Hora tertia qui missus advenisti celitus,
Nunc, deus, ad nos benignus veni, sancte spiritus.
Qui pariliter es pius ut pater et filius,
Exue nos inveniris precor, a flagiciis
Facinoribus et cunctis omnibusque vitiis
Indueque te nos gratis indignos ut respicis.
Nam fovebas universam mundi novi fabriam
Animabas atque cunctam creaturae machinam,
Ostendens multiplicandam septiformem gratiam.
Unde te rogamus, alme spiritus paraclite,
Quatinus digneris ope famulos invisere
Nosque tuos, benedicte, servulos efficere,
Ut possimus in aeternum habere propitium
Te ad patrem sempiternum filiumque maximum,
Quorum est una potestas et communis caritas,
Ineffabilis maiestas, infinita bonitas,
Admirabilis facultas et invicta pietas,
Inexplebilis voluptas, perpes inmortalitas,
Honor, virtus atque regnum, decus et imperium,
Iuge sceptrum et tropheum simulque tripudium.
Gloria sit deo patri, proli, quin spiritui,
Deo trino necnon uni, paci, vite, lumini,
Nomini nimirum dulci divinoque numini.

7. SEXTAE

Hora sexta crucifixus summi patris unicus,
Qui tuis aeterna salus, perpetim propitius
Nostros deleas excessus et peccata, quaesumus,
Et a nobis pelle tetras, lux aeterna, tenebras,
Quas Iudei perpendendas agnoverunt maculas,
Caecati profunda nocte corde, ore opere.
Unde sunt gavisi multum tanto de facinore,
Accensi nefanda nece facibus invidiae.
Sed tu, splendor, alme deus, tuis sis fidelibus
Multum clemens et benignus atque prestantissimus,
Nostra semper dona nobis peccata deplangere
Maculasque iuventutis lacrimis diluere,
Bonis iugiter instare, mala vaero fugere
Gratia semperque tua caelibes existere,
Quo perennes tibi laudes valeamus dicere,
Ex te per te in te quoque hinc possimus vivere
Teque, vitam sempiternam, flamine cognoscere
Necnon ipso debitari te semper diligere.
Hic ‘Amen’ subdo libenter dulci modulamine.
Gloria, laus, honor patri, proli ac spiritui
Ex ambobus procedenti ante orsa seculi,
Trinitati lux perenni, unitati perpeti.

8. NONAE

Hora nona qui potenter emisisti spiritum
Et nobis vite perennis contulisti premium
Providaque pensum libra consecrasti precium,
Nostrae mortis infernale penetrando baratrum
Lux et inferos cessisti, diem fundens tenebris,
Ubi tuis adsignasti vestimenta nivea,
Reprobos multasti poena meito fulgorea.
Hinc timentes et sperantes te precamur plurima:
A nobis aeterne mortis depellas formidinem
Et tuis profunde noctis auferes caliginem
Atque eos tuam transfer vite ad dulcedinem.
Tu es veste candidatus, aspectu fulmineus,
Tu es blandus et amandus, mitis et terribilis,
Tu es pulcher et dilectus ac disderabilis,
Solus vere immortalis et incommutabilis,
Tu sanctus et admirandus, idem:rex et dominus.
Purga nos multum squalentes et peccatis sordidos,
Fac nos mente luminosos, corpore perlucidos,
Ut tandem corpus exutos recognoscas candidos.
Hic ‘Fiat’ ‘Amen’que subdo, votis iungens modulos.
Gloria sit deo patri, < proli, quin spiritui,
Deo trino necnon uni, paci, vite, lumini,
Nomini nimirum dulci divinoque numini >

main page | contents